Samstag, 8. September 2007

Bryce Canyon & Zion National Park

Hey hello!

Nach nur knapp 2h Fahrt vo Richfield simmer am Mi Mittag bim Bryce Canyon acho. Oisi Erwartige sind sogar no uebertroffe worde, aecht wahnsinnig was dNatur da gschaffe haet!!


Trotz mehrere kurze Platzraege (Foti) - ihr gsehnd dae Rege verschohnt au ois noed ganz ; ) - haemmer ois noed untere kriege la und sind vo Ussichtspunkt zu Ussichtspunkt gfahre...

Wo sich dWetterlag daenn wieder besseret haet, simmer no uf e Wanderig in Canyon abe, erst daenn ischs ois richtig bewusst worde, wie hoech die rot-luechtende Felstuerm wuerkli sind! Au de zweiti Tag im Bryce haet ois super gfalle - sicher eis vo de absolute Highlights gsi bis jez uf oisem Trip...

Und daenn isch witergange richtig Zion National Park. Gad nachem Parkigang simmer uf dProb gstellt worde, aber mir haend sTunnel-Hindernis guet ueberwunde! I de USA haends naemmli glaub sozsaege kei Tunnel und im Zion haets eis womer mitem Camper nu durechunt waenn en Ranger dGaegefahrbahn absperrt und mer i de Mitti vom Tunnel ohni Beluechtig durefahrt - aber dLea haet das gekonnt gmeischteret ; ) !
Dae Hauptcanyon vom Park isch fuer privati Fahrzueg gsperrt und nur per Shuttle-Bus erreichbar, drum haet oise Ladycruiser zwei Tag Pause gha ufem Campground... : ) Trotz Temperature ueber 30 Grad haemmer oisi Wanderluscht voll usglaebt *schwitz*! Chli bloed, dasses kei Duschene gha haet ufem Campground! : ) Die senkrecht hervorstiegende Felswaend (z.T. bis 800m hoech) uf beidne Site vom Fluss sind sehr imposant gsi und so oepis haemmer beid definitiv no nie so extrem gse.

Uf oisne Wanderige haemmer jenschti wildi Tier atroffe, naebet Reh, oepis zwuesched Eichhoernli und Murmeli, riesige Schmetterling au no e chlini schwarzi Schlange mit laengs-gaele Streife!
Da no dUssicht vo oisne bequeme Camper-Ligestuehl: De Watchman (Foti), eis vo de Wahrzeiche vom Park!

So, das waehrs fuer de Moment wieder vo oisere Site, schicked oi gaanz vill:

-igi, heissi Gruessli us de USA i di kalt CH! Bea & Lea

Kommentare:

Simon hat gesagt…

Hey ihr zwei!

Danke wieder emal für die farbige und fröhliche Idrück vo euem Reisli ;)

Gsehnd härzig us i euem Rägemänteli ;)

Haued schön ufde Putz in Vegas und fallser no Luscht händ zum chli Seich mache: dä Wet'n'Wild Park am ändi vom Strip richtig Stratosphere Hotel isch än mega Spass! Alpamare hoch 10! :-)

Witerhin gueti Fahrt und liebi Grüess usde herbschtliche Schwiiz

Simon

Unknown hat gesagt…

Ola Schigas

Endli schaffis au oi i däm Blog z erreiche - im Gschäft sind Iträg leider gsperrt. Ha nur d Föteli chöne aluege :-)

Ja Ihr sind echt z beniede. Bryce und Zion sind hammer, gäll! Gem. SMS sind Ihr ja grad öppä im Tal des Todes. Passed uf, dä Old Shatterhand hät det au scho fasch sin Tod gfunde... und dä Old Simon der Schreckliche und Old Manuel der Furchtbare händ sich nur mit stündliche Duschenen chöne dur d Nacht quäle.

Danke fürs Blüemli, vergessed nöd oi soeis is Haar z stecke und ufhöre z dusche wenn Ihr uf Frisco chömed ;-)

Macheds guet! Liebi Grüess
Manuel