Fotos aus San Diego

Hallo zaeme

Aentli tuen ich eu mal paar Foto-Idrueck uf dae Blog! Viel Spass bim aluege!
Vieli liebi Gruess Beatrice

mit dae Schwiizer Kollegine im Disneyland:

Ussicht vom Gartesitzplatz daehei:

En Teil vom Huus:

d Sicht uf Downtown San Diego vom Hafe us in Coronado:

d' Edye mini Verwandti wo ich wohne:

dae Dick dae Edye ihre Maa und ihm sini Tochter wo uf bsuech gsi isch:

Halloween:

Sunneuntergang bim Strand grad bi eus i dae Naechi:

Highway N. 1

Zweite Versuch : ) jez no de Text zu de zwei Foeteli vo une:

Oisi letschti Etappe haet ois no ufem Highway N. 1 de Kueste durab gfuehrt. Das isch e super schoeni Fahrt mit mega Panorama gsi... Di letscht Nacht haemmer in Malibu verbracht und huet haemmer de Camper iwandfrei : ) in LA abgaeh!

Jez haemmer de Kreis gschlosse und sind nach 2h Greyhound-Fahrt zrugg in San Diego!
Dae Monet isch es absolut eimaligs Erlaebnis gsi wommer bestimmt no sehr oft dra zrugg daenke waerded... Jez heisst fuer mich (Lea) scho bald au wieder Abschied naeh - am Sa Morge gaht min Flueger zrugg richtig Schwiz und fuer mich (Bea) fangt wiedermal e Schuelziit a, das Mal aber uf English! : )

Hoff ihr haend amel froid gha a oisne Blog-Itraeg und in Zuekunft wird ich (Bea) mich amel ab und zue witerhin per Blog ellei melde...

Liebi Gruessli vo "ene am grosse Teich"! : )
Lea & Bea

Hello again!

Die versprochene Foeteli

Im Death Valley:

Im Yosemite:

In San Francisco:

Death Valley - Yosemite - San Francisco

Hello again!

Das isch jez oise 3. Versuch fuer en Blogitrag mit Foeteli, aber mer muend oi enttuesche leider choemer dFoeteli noed druflade - also kurzi news und dBilder daezue folged hoffentli no...

Also, reachtzitig uf de Samstig Abig simmer nomal fuer ei Nacht uf Vegas. De Usgang im Coyote Ugly isch ois zwar chli z'rockig gsi, aber suscht ischs en coole Abig gsi! Daenn simmer witer richtig Death Valley. Mir haend ois uf sehr heissi Temperatur igstellt, nachdems in Vegas scho guet 35 Grad gsi isch. Und so ischs daenn au gsi, haet ois fascht umghaue womer s'erscht Mal usgstiege sind und dae Schweiss eim nuno so abegloffe isch... ; ) Es isch tatsaechlich 45 ! Grad gsi! D'Nacht bi dere Temperatur (nie unter ca. 26 Grad) isch echt es Erlebnis, zum Glueck gits Klimaalag und Swimming pool!
D'Landschaft vom Tal des Todes isch sehr idruecklich - karg aber trotzdem sehr speziell, am meischte atah haends ois d'Sandduene. Womer am naechste Tag no ueber 2 Paess haend muesse fahre und oise Ladycruiser nuno knapp 30 Meile/h (ca. 45km/h) haet moege fahre simmer beid gad chli ischs schwitze cho... aber er haet ois natuerli noed hange la und sicher (au waenn biz langsam ; ) ) zum Park us bracht!

Nachem Death Valley wo sogar z.T. unterem Meeresspiegel lit simmer daenn witer in Yosemite National Park wo d'Berge ueber 3000m hoech sind. Die Hoeheunterschied haemmer aber mit vill Schlaf problemlos waeg gsteckt! ; ) Di straengschti Wanderig haemmer gad am afang gmacht, ueber es Waldwaegli mit weiss noed wievill Hoehemeter simmer zum Elisabeth Lake g'hiked! Di schoene Felswaend haemmer daenn am naechste Tag au vorwiegend uf Wanderige gnosse - en super schoene Park, mit senkrecht ufragende Felswaend wo sogar no hoecher sind als die im Zion!

Und daenn aendli ischs los gange richtig SAN FRANCISCO! Dae Verkehr haets guet gmeint mit ois, haend kei Stau gha und sind drum problemlos zum Campground cho. Per Shuttle Bus choemer bequem zur Downtown fahre... Bis jez haett ois die schoeni Stadt mega begeischteret (mer chas si definitiv au 2mal aluege ; ) ) , s'Interesse a Alcatraz isch aber so gross, dass mer erscht dTickets fuer morn haend choene kaufe - mir sind gspannt...
So, das waers fuer de Moment wieder vo ois, hoffed oi gahts allne guet und ev. brichtemer oi nomal vo oisne letschte Reisetaeg...

Schicked oi liebi Gruessli usem sunnige Frisco!
Bea & Lea

Bryce Canyon & Zion National Park

Hey hello!

Nach nur knapp 2h Fahrt vo Richfield simmer am Mi Mittag bim Bryce Canyon acho. Oisi Erwartige sind sogar no uebertroffe worde, aecht wahnsinnig was dNatur da gschaffe haet!!

Trotz mehrere kurze Platzraege (Foti) - ihr gsehnd dae Rege verschohnt au ois noed ganz ; ) - haemmer ois noed untere kriege la und sind vo Ussichtspunkt zu Ussichtspunkt gfahre...

Wo sich dWetterlag daenn wieder besseret haet, simmer no uf e Wanderig in Canyon abe, erst daenn ischs ois richtig bewusst worde, wie hoech die rot-luechtende Felstuerm wuerkli sind! Au de zweiti Tag im Bryce haet ois super gfalle - sicher eis vo de absolute Highlights gsi bis jez uf oisem Trip...

Und daenn isch witergange richtig Zion National Park. Gad nachem Parkigang simmer uf dProb gstellt worde, aber mir haend sTunnel-Hindernis guet ueberwunde! I de USA haends naemmli glaub sozsaege kei Tunnel und im Zion haets eis womer mitem Camper nu durechunt waenn en Ranger dGaegefahrbahn absperrt und mer i de Mitti vom Tunnel ohni Beluechtig durefahrt - aber dLea haet das gekonnt gmeischteret ; ) !
Dae Hauptcanyon vom Park isch fuer privati Fahrzueg gsperrt und nur per Shuttle-Bus erreichbar, drum haet oise Ladycruiser zwei Tag Pause gha ufem Campground... : ) Trotz Temperature ueber 30 Grad haemmer oisi Wanderluscht voll usglaebt *schwitz*! Chli bloed, dasses kei Duschene gha haet ufem Campground! : ) Die senkrecht hervorstiegende Felswaend (z.T. bis 800m hoech) uf beidne Site vom Fluss sind sehr imposant gsi und so oepis haemmer beid definitiv no nie so extrem gse.

Uf oisne Wanderige haemmer jenschti wildi Tier atroffe, naebet Reh, oepis zwuesched Eichhoernli und Murmeli, riesige Schmetterling au no e chlini schwarzi Schlange mit laengs-gaele Streife!
Da no dUssicht vo oisne bequeme Camper-Ligestuehl: De Watchman (Foti), eis vo de Wahrzeiche vom Park!

So, das waehrs fuer de Moment wieder vo oisere Site, schicked oi gaanz vill:

-igi, heissi Gruessli us de USA i di kalt CH! Bea & Lea

Lake Powell - Monument Valley - Mesa Verde und Arches

Hallo Zaeme!

Lang ist es her : ) aber aendli haemmer wiedermal en Compi gfunde!
Wiener scho im Titel gsehnd, mir haend wieder vill gse...

Am Lake Powell haets ois so guet gfalle, dass mer gad no en zweite Tag blibe sind. Mir haends mega gnosse bim Bade im See, am Abig im Jacuzzi und ufere Bootstour dur en super schoene Canyon.
Nacher ischs witergange richtig Monument Valley - mega beidruckend die rote Felsmonument i de Ebeni...

Uf villsitige Afrag: Da no oise Ladycruiser (oder Ladykracher : ) ), isch also oepe de chlinscht da i de USA - dAmis sind ja was Auto betrifft sehr bescheide... ; )

Nachere Nacht ufem Campground mit super Ussicht simmer witer gfaetzt richtig Mesa Verde.
Ufere gfuehrte Tour dur de Cliff Palace (Foti) haemmer spannendi Infos uebercho. Es isch echt faszinierend, dass die Baute unter de Felsvorsprueng sit ueber 800 Jahr existiered und mer bis huet noed weiss waerums verlah worde sind!

Nachere kalte Nacht im Mesa Verde Park (ca. 6 Grad uf 2500 m ue. M.) simmer am Morge los richtig Arches National Park im Norde vo Utah. Grad echli erschlage vo de 38 ! Grad womer acho sind, haemmer de Namittag am Pool verbracht und sind erst gaeg de Abig in Park. Mir haend dann e sehr heissi und drum nur kurzi Wanderig zu de 'delicate arch' (Foti -> links oben)gmacht. Au di andere Arches sind wunderschoen und de Park allgemein haet ois sehr guet gfalle!

Und daenn ischs aendli sowit gsi: Da Mo 3.9. und somit da Bea ihre 24. Geburi! Mir haend entschiede, dass mir daenn wieder en Tag ohni Fahre mached und sind drum am Morge go 'river raftae' ufem Colorado River! Uf oisem Kajak womer i de zweite Haelfti vom Trip haend choene naeh, haemmer daen en mega fun gha... : ) Am Mittag haemmer daen mit Cheesecake (liebs Gruessli a Saby, Simon und Manu - ha natuerli schwaer a oi daenkt!!!) und happy Birthday-Kerzli usgiebig gfiret! Merci villmal fuer all di liebe Geburi-Gruessli vo oi! Bea

Und huet ischs witergange richtig Richfield - de Zwueschestation zum Bryce Canyon wo ois morn erwartet, mir froied ois scho riesig...

Liebs und vorallem warms Gruessli i dCH, Bea & Lea

P.S.

To Christoph:

Dini CD isch aso i de Lady-Cruiser-Charts uf Platz 1 - mir sind begeischteret, merci villmal! ; )

To Simon:

Merci nomal fuer di super Reiseplanig und Uswahl vo de Paerks! Aber oise Lady-Cruiser ghoert aso definitiv noed zu de 'slow vehicle' : ) - mir haend bis jez all Streckene i ca. de halbe Ziit gschafft! D'Strasse sind super, sodass mr mit oeppe enere Durchschnittsgschwindigkeit vo

65 Meile/h (ca. 100 km/h) choend fahre, sind drum nie villme als 3h/Tag unterwaegs gsi und haend scho 2 Ruhetaeg me ilegge choene!

To all the others : ) :

Merci villmal fuer oii Kommentaer, froied ois jedesmal mega!

Las Vegas - Grand Canyon

Hallo Zaeme mir laebed no : )

Haend daenkt mir maelded ois uf dem Waeg wieder, will mr jez nach 2 Taeg absoluter Abgschiedeheit wieder i dZivilisation in Page (Lake Powell) acho sind...
Also, oisi Taeg in Vegas haemmer no usgibig gnosse und ois vo allne dene Idrueck berisle la! Wie mer gseht haemmer sogar e noii Fruendin gfunde (Foti : ) ):

Aber au in Venedig (Foti) und Paris haetts ois super gfalle : ). Und um New York haemmer no e Rundi im Rollercoaster draeht... Mir sind begeisteret vo de Art wie die Staedt all nahbaue worde sind - isch es mega Erlebnis gsi!!

Nacheme gmuetliche Vormittag am Swimmingpool ufem Campground bi ca. 33 Grad simmer daenn los richtig Grand Canyon. Haend e riiese Strecki vor ois gha und sind denn erliechteret gsi wommer nach 6h am Igang vom Park acho sind. Mir haend ois uf eme Campground am North Rim im Wald gad bim Parkigang niederla - ohni Strom & Wasser, ohni Duschene, nur mit Plumpsklo... : )

D'Idrueck vom Canyon sind ueberwaeltigend gsi, mached ois saelber es Bild:

Jez froiemer ois uf e gmuetlichi, sehr heissi Ziit da in Page am Lake Powell...
Bis zum naechschte Mal, liebi Gruessli Bea & Lea

LA - Santa Monica - Las Vegas

Hallo zaeme!

Nachdem mer guet im Hotel in Santa Monica acho sind, haet sich de "kurzi" Waeg nach Hollywood als es chlises Abendteuer usegstellt. Nach ueber ere halb Stund Busfahrt haemer dNerve langsam verlore, will mer gwuesst haend mr muend nomal umstiege unds voll noed haend choene ischaetze wie lang dases no gaht... Aber, schafft:

Bea und Lea at the walk of fame : ) ->

Am Samstigmorge haemmer daenn de schoeni Strand vo Santa Monica gnosse. Ois haet dae Teil vo Los Angeles mega gfalle, super schoeni Strandpromenade mit Palme und au en mega Strand (siehe Foto : ) )

Will mer am SA Nami de Camper haend choene uebernaeh simer vorem Hotel mit de Limousine (haend eigentli miteme Taxi grechnet) abgholt worde - em Fahrer vo Cruise America! D'Amis ueberrasched ois immerwieder ufs noie... : )

Und daenn, di erst Begaegnig mit oisem 'Lady Cruiser'! Nach de ziemli schwere Uebernahm (alles Gschirr, Pfanne usw. schleppe) is daenn losgange ufem 6-spurige Highway dur LA - dBea haet das profimaessig gmeisteret!!!

Nach 3 Stund fahre inkl. Stau in LA haemmer ois entschiede scho vor Las Vegas z'uebernachte. Mit Schwumm im Pool am 10ni i de Nacht und am Morge frueh haet sich trotz grosser Hitz guet laebe la... ; )

Huet ischs daenn aendli richtig Las Vegas witergange. Nach usgibiger Shopping-Tour ime Outlet Store und Gwitter i de Wuesti (das gits tatsaechli?!) simmer ufem Campground Oasis (danke fuer de gueti Tip Simon & Manu) in Las Vegas acho! Voller Tatedrang und Neugier simmer denn an Strip... WOW... Las Vegas isch wuerkli es wahrs Erlebnis!! Mir freued ois scho uf di naechscht Taeg da...

Mir froied ois mega ueber jede Kommentar vo oi und bis zum naechste Mal...
Liebi Poker-Gruessli us Las Vegas, Bea & Lea

Nach langer Reis (22h ! ) in San Diego acho!

Hallo zaeme!

Freudig haemmer oisi Reis am Mittwuch Morge in Zueri gstartet! Nach iwandfreiem aber seehr langem Flug simmer am viertel vor 7ni todmued in San Diego acho, waehrend ihr i de CH scho lang am schlafe gsi sind (am viertel vor 4i i dae Nacht). Trotz afaengliche Bedaenke haet ois de charmanti Ami-Zoellner und de "Droge-Spuehr-Hund" : ) sogar uf Amerika inelah! De Bea ihri Verwandte haend ois haerzlich am Flughafe empfange und i ihrem super schoene Huus iquartiert.

Nach gueter Nacht mit seehr vill Schlaf haemmer huet mit persoenlichem Stadtguide us de CH (e Kollegin vonere Studiekollegin vo de Lea wo 2 Jahr in San Diego laebt) e interessanti Tour dur San Diego gmacht - Old Town, Balboa Park, Beach und Down Town... Dae Mc Donalds haemmer bis jez no ignoriert, mal luege wie langs no gaht bis ois inezieht... : )

Morn gahts per Greyhound witer nach Los Angeles, usgrueschtet mit jenschte Bus-Plaenli simmer jez au sicher, dass mr sHotel daenn finded - LA haet immerhin en Durchmesser wie dStrecki vo Zueri nach Bern - unvorstellbar! : )

Mir froied ois uf de naechschti "Kontakt" mit oi und
schicked warmi, sunnigi Gruessli us San Diego!
Bea & Lea

.... noch 32 Tage bis zum Abflug..... wir freuen uns riesig!!!!