Mittwoch, 29. August 2007

Las Vegas - Grand Canyon

Hallo Zaeme mir laebed no : )

Haend daenkt mir maelded ois uf dem Waeg wieder, will mr jez nach 2 Taeg absoluter Abgschiedeheit wieder i dZivilisation in Page (Lake Powell) acho sind...
Also, oisi Taeg in Vegas haemmer no usgibig gnosse und ois vo allne dene Idrueck berisle la! Wie mer gseht haemmer sogar e noii Fruendin gfunde (Foti : ) ):


Aber au in Venedig (Foti) und Paris haetts ois super gfalle : ). Und um New York haemmer no e Rundi im Rollercoaster draeht... Mir sind begeisteret vo de Art wie die Staedt all nahbaue worde sind - isch es mega Erlebnis gsi!!

Nacheme gmuetliche Vormittag am Swimmingpool ufem Campground bi ca. 33 Grad simmer daenn los richtig Grand Canyon. Haend e riiese Strecki vor ois gha und sind denn erliechteret gsi wommer nach 6h am Igang vom Park acho sind. Mir haend ois uf eme Campground am North Rim im Wald gad bim Parkigang niederla - ohni Strom & Wasser, ohni Duschene, nur mit Plumpsklo... : )

D'Idrueck vom Canyon sind ueberwaeltigend gsi, mached ois saelber es Bild:





Jez froiemer ois uf e gmuetlichi, sehr heissi Ziit da in Page am Lake Powell...
Bis zum naechschte Mal, liebi Gruessli Bea & Lea

5 Kommentare:

bocchettis hat gesagt…

Hoi zäme
Weil das Bild vom Grand Canyon so imposant isch, han is grad als Hintergrundbild uf min compi glade!! Super! Händ's guet und liebi grüess Mama vo de Beatrice

p.s. de Pa wett so gern de Camper gseh!!

Simona hat gesagt…

Hey gseht mega us bi eu und bin aso beiidruckt, wie fliissig ihr da Infos posted!
Schicked chli vo dä Hitz da ane, mir früüräd scho chli...
Aber jetz dörf ich ja au nomal chli go entspane und hoff uf heissi Täg am Meer.
Händ aso ä gueti Wuche!
Schmatz Simona

Etters hat gesagt…

Hallo Zäme!
Zerscht ämol herzlichi Gratulation zu därä super Sitä!Gspannt lesed mir euri Reiseidrück und dur diä super Fotene macht meh d'Reis gad mit.Witerhin spannendi Erlebnis wünsched eu dä Thomas + d'Mirjam

Jeannine hat gesagt…

Hallo
Isch jo super. werd jetzt öfters cho inägüxlä.;-)
I wünsch eu witerhin vill Spass.
LG Jeannine mit Janik

Thomas hat gesagt…

Hoi zämu

Zuerscht emal will öi ich ew es Komplimänt machu fär di supär page! Wiemu uf dä Bildär gseht gniessät ier sus!. Di Bildär wa ier gmacht heit sind sehr güet und am liebschtu wellti ö grad da si! Gniesset sus witärhin!

En liebe Grüess dr Thomas